CEBU, Philippines - Mikulit sa ilang ikaduhang sagunson nga daog ang bisitang University of the Philippines (UP) Fighting Maroons pinaagi sa paglubong sa Lion Tiger Aerosol-UV Lancers, 82-61 sa nagpadayong 5th CESAFI Partners' Cup kagabii didto sa Cebu Coliseum.
Dali ra kaayong nakahimo’g adjustment ang Fighting Maroons batok sa sistema sa lokal basketbol tungod kay yano nilang gibiyaan ang Lion Tiger pagsugod pa lang sa third period diin ilang gitapos ang maong kuwarter, 51-47 gikan sa 33-29 nga labaw sa halftime.
Padayong naglabaw ang UP sa fourth period ug wala nila igsapayan ang depensa sa Lion Tiger tungod kay nangigo man ang ilang tirada sa gawas aron molampos batok sa ikaduhang Cebuano team.
Sa miaging adlaw ila sab gipukan ang San Marino Corned Tuna-SWU Cobras sa usa ka pisikal nga duwa, 65-56.
Sila si Moriah Joel Gingerich ug Mike Gamboa parehong mibahog og 12 puntos alang sa Fighting Maroons, samtang si Jett Manuel midugang og 10 puntos.
Samtang ang Lion Tiger gipangulohan nilang Chris Perolino ug Edrian Lao nga nagkumboya og 22 puntos. (BANATSPORTS)