CEBU, Philippines - Dul-an na sa 50 ka teams ang nagparehistro alang sa 11th CAFC National Inter-Club Football Cup karong Mayo 21-29 nga sagad duwaon diha sa University of San Carlos-Technological Center sa Brgy. Talamban, ning siyudad.
Ang aksiyon ning tuiga naglatid og pito ka kategoriya nga naglakip sa players 10, boys 12, 14, 17, men's open, 40-above ug ang labing bag-o nga girls 17.
Ang players 10 ug boys 12 adto duwaon sa Paref-Springdale sa Lahug, ang boys 14, girls 17 ug 40-above adto sa San Roque Parish field sa Subangdaku sa Mandaue, samtang ang uban duwaon sa USC-TC sa Talamban.
Labing daghan nga mga entrante mao ang boys 17 nga adunay siyam, samtang ang players 10, boys 12 ug 14 adunay tag-walo ka teams.
Sa pagka karon, ang men's open adunay unom ka teams, samtang ang 40-above adunay lima ug ang girls 17 adunay upat ka koponan.
Lima ka out-of-town clubs ang nipadala og mga entries nga naglakip sa Aroroy Football Club sa Masbate, Westbridge sa Iloilo City, Ormoc Football Club, Manila Soccer Academy ug ang Hijos Football Club sa Samar. (BANAT NEWS)