CEBU, Philippines - Puno sa aksiyon ug kulbahinam nga boxing event nga uloha'g "Bangga sa Kinomo sa Medellin" ang mahitabo karong gabii nga adto himuon sa Medellin Sports Gym.
Magsangka sa main event mao ang pambato sa Omega Boxing Gym nga si Edison Serrano batok ni RJ Anoos sa Liloan.
Laraw ni Serrano nga mokulit sa ikaupat niyang daog sa pito ka away batok sa kanhi National Open Amateur boxing tournament gold medalist nga si Anoos, kinsa adunay tulo ka daog duha ang pilde ug 1KO.
Mo-away usab ang stablemate ni Serrano nga si Julius Alcos (16-8, 3KOs) batok ni Erwin Pulvera (3-8, 2KOs) sa Phil-Aust Gym sa Mandaue City. Ang lightweight prospect sa Siquijor nga si Rajah James Tan-awon mopakita sa iyang abilidad sa iyang debut fight batok ni Ariel Adan sa Mandaue.
Magsinukliay usab sa ilang mga kumo sila si Roldan Beriso ug Marlou Sandoval sa light flyweight division.
Ang maong boxing card gipasiugdahan sa Rex 'Wakee' Salud (RWS) Promotions uban sa suporta sa kagamhanan sa lungsod sa Medellin ubos sa liderato ni Mayor Ricky Ramirez. (BANAT NEWS)