CEBU, Philippines - Mihayag na ang dalan sa Brgy. Ginebra Kings sa posibling laing PBA finals appearance human nila tiwasi ang Smart Gilas Pilipinas, 110-103, sa Game-2 sa ilang “best-of-five” semifinals series sa Commissioner’s Cup kagahapon didto sa Araneta Coliseum.
Ang Ginebra katapusang misulod sa championship round niadtong tuig 2009, diin gipilde sila sa ilang igsuong koponan San Miguel Beer alang sa Fiesta Cup title.
Gipakita sa Ginebra nga dili taghap ang ilang daog sa Game-1 batok sa power-house National team human nila gilupig sa opensa ang depensa ang mga batos ni Serbian coach Rajko Toroman alang sa 2-0 nga labaw sa serye.
Bisan pa sa presensiya sa 6-foot-9 nga si Marcus Douthit, nakabuylo gihapon sila si Mark Caguiao ug import Natre Brumfield dihang nagkumboya sila og 31 puntos alang sa kwatro puntos nga labaw, 55-51 sa halftime.
Aron sumpuon ang init nga scoring sa Ginebra, mihimo og adjustment si Toroman sa depensa, apan wala gihapon kini makapugong sa kanhi MVP nga si Caguiao kinsa migara na hinuon sa third period human miposa og 10 puntos.
Human sa duha ka free-throw ni Ronald Tubid, giposte sa Ginebra ang labing daku nilang labaw 94-84 sa katapusang sayes minutos sa duwa.
Gawas sa mga turn-overs ug tab-ang nga three-point shooting, nakadugang usab sa demalas sa Gilas ang pagka-injured sa ilang point guard nga si Mark Barroca.
Si Brumfield maoy leading scorer pinaagi sa iyang conference-high 45 puntos uban sa 11 ka rebounds. - BANAT NEWS