MANILA, Philippines - Umarangkada ang Ateneo sa fifth set para kunin ang 2-0 karta mula sa 25-19, 24-26, 17-25, 25-19, 15-6 panalo sa Lyceum sa Shakey’s V-League kahapon sa The Arena sa San Juan City.
Nagtambal sa net sina Alyssa Valdez at Thai import Lithawat Kesinee upang makuha ng Lady Eagles ang 8-0 lamang na siyang tumapos sa laban ng Lady Pirates sa kompetisyong inorganisa ng Sports Vision at suportado ng Shakey’s Pizza.
“Maganda ang inilaro ng Lyceum at nawala sa focus ang mga bata. Pero ang maganda ay nakarekober sila lalo na sa last two sets,” wika ni Ateneo coach Charo Soriano.
May career-high 27 hits si Valdez kasama ang dalawang service aces, habang tig-18 ang ibinigay nina Kesinee at Fille Cainglet.
Dinomina naman ng University of St. La Salle ang National University patungo sa 25-19, 25-18, 25-17, panalo sa unang laro.