CEBU, Philippines - Gipaabot nga maghugop ang mga mountaineers ug outdoor enthusiasts sa 8th Visayas Mountain Festival karong Huwebes didto sa Brgy. Taptap sa bukirang bahin sa dakbayan sa Sugbu.
Gipasiugdahan sa Mountaineering Federation of the Philippines Inc. (MFPI), ang maong sporting events naglatid sa hiking, caving, basic mountaineering ug biking libut sa kabarangayan sa Taptap, Tagbao, Tabunan ug Sudlon.
Kini mao ang unang higayon sa Cebu City nga mo-host sa maong sporting events nga suportahan sa kagamhanan sa siyudad sa Sugbu.
"Paagi ni siya nga ipakita nga dili lang ta kutob sa Sinulog, tungod kay daghan kaayo tang mga nindot nga bukid ug caves nga naa mismo dinhi sa atong syudad," matud pa ni Cebu City Councilor Margot Osmeña atol sa press conference kagahapon nga gipangulohan ni Vice Mayor Augustus Joy Young didto sa City Hall.
Aduna kini registration fee nga P500 ug kutob lang karon adlawa ang pagpanglista didto sa Ayala Active Zone.
Niadtong dili makaparehistro karong adlawa, adunay onsite registration sa adlaw na sa kalihukan, apan mokantidad na kini og P600.
Ang tanang mosalmot sa mountain festival makadawat og event shirt ug certificates. - BANAT NEWS