CEBU, Philippines - Gidemolis sa defending champion Subangdaku ang Banilad aron magpabiling walay pilde sa 4th Mandaue City Mayor's Cup volleyball tournament sa miaging gabii didto sa Mandaue City Hall grounds.
Ang Subangdaku ni coach Dino Aribal milatos sa Banilad sa first set, 25-22 luyo sa mga atake ni kanhi volleyball varsity stalwarts Roderick Arenasa, Edward Carlo Tecson, Geroel Aragones, Mamerto Dumaog, Aldin Potot ug Ryan Fuentes.
Ang Subangdaku mitiwas sa Banilad sa ikaduhang duwa, human nakabawi gikan sa 21-22 nga alkanse aron pagposte og 25-22 nga kadaugan.
Sa laing duwa, ang Looc mipilde sa Umapad sud gihapon sa duha ka sets, 25-22, 25-21. Ang Looc moharong sunod sa Subangdaku.
Sa pikas bahin, ang Banilad mipatigbabaw batok sa Basak, 25-20, 25-21 pinaagi sa mga paningkamot sa managsuong Danika ug Kim Gendrauli ug Dianne Bercede.
Midaog sab ang Centro batok sa Tipolo, 25-22, 25-18 kortesiya nilang Rachel Hanna Singson, Janice Igot, Juvelyn Glipo, Cherie Echevare ug Angel Borbajo. - BANAT NEWS