CEBU, Philippines - Gilat-an sa JJTS ni team manager Roger Ompad ang Rulls Bakeshop ni Rupert Cañizar, 80-64 aron moabante sa semifinals sa LLBA Rollway Cup basketball tournament didto sa Villas Magallanes gym sa Lapu-Lapu City.
Sa pasiunang duwa, nakaangkon sab og luna sa semis ang Lheo Autoshop ni Leo Almacin pinaagi sa pag-iskor og 86-81 nga kadaugan batok sa Solmeat ni Leo Bascon.
Ang "best-of-three" semis sugdan karong gabii didto gihapon sa Villas Magallanes gym.Ang JJTS nabiyaan og tres puntos, 15-18 paghuman sa first period, apan mibukal ang kainit niini sa sunod nga kuwarter pinaagi sa paglusad og 28-9 aron mo-iskor og makabungog nga labaw sa halftime, 43-27 ug wala na kini molingi pa sukad niadto.
Lima ka players ang mihaling og double figures alang sa JJTS. Si Cacay Verzosa miugbok og 17 puntos, gisundan ni John Taghoy nga adunay 13 puntos, sila si Roger Ompad ug Walter Bardago parehong mitikdol og 11 puntos, samtang si Kirby Gutib adunay 10 puntos.
Si Allan Sepe, kinsa migaling og 17 puntos mao sab ang nangu sa pilderong Rulls Bakeshop. Sila si Eddie Alian ug Kit Inso milunod og 11 puntos matag usa.
Sa laing bahin, ang Lheo Auto Shop gipangulohan ni Rene Cuadra, kinsa milabyog og 20 puntos, samtang ang pilderong Solmeat gipangulohan sab ni Dandan Ramos pinaagi sa iyang 26 puntos.
Ang LLBA Rollway Cup gipaluyohan sab ni Rolly dela Pieza ug JB Sportswear nilang Judith ug Billy Nadado.
PUNTOS MATAG USA
Unang duwa:
LHEO AUTO SHOP (86) - Cuadra 20, Paquibot 15, Villamor 12, Lamoste 11, Igot 10, Cosep 8, Augusto 3, Arong 3, Francisco 2, Asuncion 2
SOL MEAT (81) - Ramos 26, Lazaraga 14, Plarisan 10, Dorig 10, Tampus 7, Bascon 6, Alicin 3, Padillo 2, Bascon 2, Ybañez 1
Ikaduhang duwa:
JJTS (80) - Versoza 17, Taghoy 13, Ompad 11, Baldago 11, Gutib 10, Cordero 5, Adlit 2, Rukawa 1
RULLS BAKESHOP (64) - Sepe 17, Alian 11, Inso 11, Yubal 9, Ompad 8, Medina 4, Llenes 2, Bensi 2 - BANAT NEWS