CEBU, Philippines - Kursonada si Mexican brawler Rosendo 'El Matador' Vega nga mosulong dinhi sa Sugbu aron makigsinukliay og kumo batok ni ALA fighter Milan 'El Metodico' Melindo karong Sabado sa "Pinoy Pride 4: Philippines vs. World" diha sa Waterfront Cebu City Hotel and Casino.
Gawas sa tinguha nga ilakip si Melindo sa lista sa iyang mga biktima, si Vega mibahad nga tumbahon niya ang Pinoy boksidor isip panimalos sa kapildihan sa iyang kababayan nga si Fernando Montiel, kinsa gipakamang ni Nonito Donaire Jr. niadtong Pebrero 19 didto sa Las Vegas.
Babagan usab ni Vega ang dakung damgo ni Melindo nga mamahimong mandatory challenger ni South African Moruti Mthalane alang sa IBF flyweight title.
Dili basta-basta si Vega tungod kay nakasinati na kini sa usa ka 10 round nga binukbukay batok ni WBA flyweight champion Daiki Kameda sa Japan. (BANAT NEWS)