CEBU, Philippines - Usa ka kampiyon sa Indonesia ang sunod harungon ni OPBF flyweight titlist Rocky 'Road Warrior' Fuentes.
Ang taga-Mambaling nga si Fuentes moharong ni Indonesian super flyweight champion Jemmy 'Boom Boom' Gobel sa undercard sa "Pinoy Pride 4: Philippines vs. the World" karong Marso 19 sa Waterfront Cebu City Hotel and Casino.
Human sa malampuson niyang kampanya sa miaging tuig diin naangkon niya ang OPBF belt batok ni Masafumi Okubo didto sa Japan, plano ni Fuentes nga mohipos pa og dugang daog aron matuman ang gidamgo niyang world title fight.
Si Fuentes misaka karon sa ranking diin mipuwesto siya sa No. 7 sa IBF, No. 6 sa WBA, No. 4 sa WBO ug No. 3 sa WBC.
Dili hinuon kabintahaan si Gobel kay beterano na kini nga adunay 27 ka away lakip na ang mga elite boxers sa super flyweight division sama nila ni Nouldy Manakane, Ali Rochmad, ug Pramuansak Posuwan. (BANAT NEWS)