CEBU, Philippines - Andam na ang tanan alang sa labing unang Xterra Philippine Championship nga mosikad ugma didto sa Amara Subdivision sa Liloan, Cebu.
Dul-an sa 100 ka mga partisipante nga naglakip sa triathletes gikan sa 11 ka nasud sama sa Australia, Austria, Brazil, Canada, Japan, Malaysia, Scotland, Singapore, Switzerland, United Kingdom ug United States magsinukdanay sa ilang abilidad.
Ang XTERRA sugdan sa langoy sud sa duha ka loops nga adunay 1.5 kilometer course sa dagat duol sa 100-year old Liloan Lighthouse.
Sundan kini sa 32 kilometros nga mountainbiking libot sa baybayon sa Camotes Sea ug tapuson sa 10km run duol sa San Fernando Rey Parish Church.
Usa kini ka dakung kalihukan kay mosalmot man ang mga world champions sama nithree-time Xterra titlist Renata Bucher, Sam Gardner, 2009 Amateur World Champion Darrelle Parker; South Africa Champion Carina Wasle ug defending world champion Shonny Vanlandingham.
Mopakita usab og aksiyon ang mga local bets sama nila ni reigning Iroman 70.3 champion Neil Catiil, third placer Noy Jopson, 2009 champion LC Langit ug uban pang elite Filipino contenders.
Gawas sa ganting salapi, ang modaog sa age group category makakuha sab og oportunidad nga mosalmot sa Xterra World Championship karong Oktubre 23 didto sa Makena, Maui. (BANATSPORTS)