CEBU, Philippines - Naplansa na ang mga detalye alang sa 1st M. Lhuillier-Cebu Basketball Association (CBA) nga buksan karong Pebrero 27.
Sa ilang tigum kagahapon didto sa Yayoy’s Grill and Resto Bar, si league commissioner Raul 'Yayoy' Alcoseba uban ang team owners, coaches ug managers mihan-ay na sa tanang detalye alang sa usa ka bulan nga torneyo nga mosubay og single round robin format.
Pito ka mga koponan ang mikompirmar sa ilang partisipasyon nga naglakip sa Asian College of Technology (ACT), La Fortuna Hotel, Salazar Colleges of Science Institute of Technology (SCSIT), Ave Maria Sanctuary Park, Gemmary Pawnshop, Mandaue City ug Talisay City.
Tungod sa pag-atras sa Lapu-Lapu City, ang mga organizers nagpaabot karon og laing koponan nga mohulip sa bakanteng luna aron mahitsas ang eight-team line-up sa torneyo.
Gamiton sa liga ang lagda sa FIBA, apan dili na nila sundon ang home-and-away system sa Liga Pilipinas.
"Wala nay home-and-away format, we are now considering only three more venues like Cebu, Mandaue and Talisay City," matud pa ni Alcoseba.
Tungod sa pagdumili sa Cebu Schools Athletic Foundation Inc. (CESAFI) nga paduwaon ang ilang varsity players sa CBA, ang mga team managers ug coaches magsalig karon sa mga commercial veterans ug mga out-of-school youths nga mopakita sa ilang abilidad sa hardcourt.
Ang kampiyon mobulsa og P200,000, samtang ang mopahiluna gikan sa ikaduha hangtod sa ikaupat makadawat og P100,000, P60,000 ug P40,000. (BANATSPORTS)