CEBU, Philippines - Gitiwasan sa Hoopers quintet ni team leader Yoli Meso ang mas batan-on nilang kaatbang nga Next Gen Security Agency human sa ilang 82-72 nga kadaogan kaniadtong Sabado ug miharus sa ilang best-of-three championship series sa 2-0 aron sakmiton ang korona sa Philippine Institute of Certified Public Accountants (PICPA) didto sa Capitol Parish Gym sa dalan Escario, ning dakbayan.
Parehong wala mohatag og bentaha ang duha ka habig sulod sa duha ka quarters tungod kay maayo sab nakadepensa ang Next Gen. Human sa ilang 25-24 nga labaw sa first period apan migamit og 17-11 scoring run ang Next Gen aron makakuha'g 41-36 nga abante atol sa halftime break.
Migamit dayon si coach Norwin Honoridez ug 1-2-2 nga zone defense ug gipahimuslan ang kaabtik ug kapaspas sa ilang point guard nga si Andre Tocao ug offguard Beedict Bandala aron papason ang singko puntos nga biya ug gitapos ang third period sa 53-51 nga abante.
Wala gihapon molugak sa ilang depensa ang Hoopers sa fourth period ug didto na nila gigamit ang tanang pamaagi aron nagkontrolar sa duwa diin mibahug ug maayo ang MVP nga si Lito Ortiz inabagan sa managso-ong Jun ug Dondon Santiago aron mag-anam og distansiya ug maglawig ngadto sa kadaogan.
Sila si Ortiz ug ang Santiago brothers maoy naghatag og dakong danyos ngadto sa Next Gen dihang pulos sila miposa ug 14 puntos matag usa ug midugang sila si Jonar Torres ug Bandala og 11 ug 10 puntos, matag usa.
Si Roldan Tayong maoy nangu sa Next Gen ni playing coach Atty. Rheneir Mora sa iyang 16 puntos, si Ryan Alejandre midugang og 14 puntos ug si Michael Jumoad mi-iskor og 10 puntos.
Ang awarding ceremony sa maong torneyo ipahigayon sa sunod semana.
Puntos matag usa:
Hoopers (82)—Ortiz 14, J. Santiago 14, D. Santiago 14, Torres 11, Bandala 10, Tocao 7, Meso 4, F. Yu 2, A. Yu 2, Veltran 2, J. Makinao 2, Makinao 2
Next Gen (72)— Tayong 16, Alejandre 14, Jumoad 11, Bonsucan 9, Seares 6, Flores 4, Judaya 4, Huyco 3, Mora 2, Supilanas 2, Galo 1