CEBU, Philippines - Gilupig ni Jon-Jon Adlawan ang karibal niyang si Kimboy Pineda aron maangkon ang pro open title sa first leg sa 2011 MS Motosuit Motocross Series nga giuloha'g 1st Mayor Bernard 'Butch Sepulveda Motocross Competition niadtong Domingo didto sa Cadaruhan sa Borbon.
Nakabitbit hinuon og titulo si Pineda human iyang gidominar ang experts class.
Si Pepo Rubi mihipos og duha ka third place trophy sa expert ug pro open class.
Sa laing bahin, si Weng Yapparcon naghari sa intermediate class batok sa crowd-darling John Flores ug Cyril Tariman nga mipahiluna sa ikaduha ug ikatulo nga dapit.
Misanag ang adlaw ni Yapparcon dihang ang iyang anak nga babaye nga si Marriane mihawod sa peewee special class batok ni Kerry Keizer Ornopia ug RK Cuesta.
Mihakot si Donkey Sanchez og duha ka titulo ug usa ka runner-up trophy. Si Sanchez mipukan nilang Alex Abalo ug Jay Sanico aron masakmit ang titulo sa local enduro category. Iya usab nga gipilde silang Dodong Batiquin ug Jay Sanico sa open enduro title.
Pakyas si Sanchez pagposte og talagsaong tulo ka daog dihang napilde siya ngadto ni Cyril Tariman sa novice open production.
Si Jun Enriquez maoy miangkon sa executive A title dihang iyang gipilde ang paborito ug race track designer Siegfred Ornopia, samtang si Nonoy Reluya mitapos sa ikatulo.
Si Roscel Gungob maoy nanghawod sa executive B.
Sa labing unang higayon, walay bisan usa sa tulo ka mga anak ni Ornopia ang midaog sa kampiyonato.
Si Earl Jean Brylle Ornopia igo lang mitapos sa ikaduha sa mini class nga giharian ni Jouge Basco, samtang si Ken Kerry Ornopia mikapyot sa ikaupat sa peewee division.
Sila si Omar Sabal, Gerry Sicad ug Kent Limpag maoy mikompleto sa linya sa mga kampiyon.
Si Sabal naghari sa beginners open production human iyang gipilde silang Jinggoy Mayol ug Martin Nuñez, si Sicad mao sab ang naghari sa executive C batok nilang Butch Flores ug Joy Nacua, samtang si Limpag nidaog sa underbone/patra class batok nilang Mark Frasco ug Reden Bravo. (BANAT NEWS)