CEBU, Philippines - Laing kulbahinam nga aksiyon sa basketbol ang subling masaksihan sa mga Sugbuanon sa dihang ang multi-titled M. Lhuillier Kwarta Padala Cebu Niños makigsangka sa tulo ka elite teams sa Philippine Basketball Association (PBA) sa tulo ka adlaw nga torneyo sa Cebu City Mayor’s Cup Invitational sugod karong Enero 25.
Sa dili pa nila sugdan ang ilang kampanita sa fourth season sa Smart Liga Pilipinas, ang Niños, nidaog sa laing unang Tournament of the Philippines (TOP), sukdon una ang abilidad niini sa Meralco Bolts, Powerade Tigers ug reigning Fiesta Cup titlist Alaska Aces.
"This is a prelude of the things to come. Tan-awon nato if makasugakod ba ta or makasustinir ba atong mga bata kontra PBA teams," matud ni M. Lhuillier coach Raul 'Yayoy' Alcoseba sa press conference kagahapon didto sa Yayoy’s Grill and Resto Bar.
Sa unang adlaw sa torneyo, ang Niños makigharong sa Meralco sa main game sa alas-7 sa gabii, human sa duwa tali sa Alaska ug Powerade sa alas-5 sa hapon.
Sa sunod adlaw, ang Meralco makigsangka sa Aces sa unang duwa ug dayon ang Niños batok sa Powerade.
Sa Enero 27, ang Bolts moduwa batok sa Tigers, sundan sa sangka sa Niños ug Aces.
Sa gihapon, si Alcoseba mosandig sa iyang starting five nga sila si Bruce Dacia, Stephen Padilla, Marlon Basco, Abby Santos ug Ariel Mepaña. Maglaum sab kini sa abilidad nilang Richard Ian Saladaga, Mark Ababon, Frank Nailon, Hafer Mondragon, Mark Magsumbol ug Eliud Poligrates.
Aron modugang og kusog sa ilang opensa, si Alcoseba mikuha sa serbisyo nilang kanhi Alaska guard Ariel Capuz, Fil-Am Nick Monaco ug import nga si Jeremy Robinson.
Ang mga tiket nagkatidad og P300 alang sa ringside, P250 lower box, P150 upper box ug P50 sa general admission. – BANAT NEWS