CEBU, Philippines - Sa makausa pa, ang Philippine Dental Association (PDA) mopahigayon na usab sa ilang tinuig nga lumba nga ulohan og "Run with a Smile" karong Pebrero 13 diha sa The Terraces sa Ayala Center-Cebu.
Gibahin sa tulo ka kategoriya -- 12K, 6K ug 3K, ang maong lumba kabahin sa 7th National Dental Health Month nga may tema nga “Ngipin Kayamanan, Pagkasira Huwag Hayaan, Dentistang Mapagkalinga, Handa Kang Gabayan."
Si Dr. Christine Carvajal, usa sa mga organizers sa maong kalihukan malaumon nga makab-ot nila ang target nga 1,300 runners nga mosalmot ning tuiga.
Matud pa ni Carvajal nga sama sa miaging tuig ang maong lumba magsilbe usab nga fund raising activity alang sa ilang mga proyekto sama sa Mobile Dental Van, Free Dental Mission, Dental Health Education Programs ug libreng dental examination ug treatment ngadto sa nagkadaiyang public schools dinhi sa Sugbu.
Sa mga interesadong mosalmot, ang registration fee nagkantidad og P300 ug mahimong magparehistro diha sa Cebu City Sports Center ug Runnr sa Ayala. - BANAT NEWS