CEBU, Philippines - Naluwas pinaagi sa penalty shotout ang University of San Carlos (USC) ug ang Sacred Heart School-Ateneo de Cebu ug maoy naghari sa tagsa-tagsa nila ka dibisyon sa 1st Sinulog Football Cup niadtong miaging adlaw didto sa University of San Carlos-Technological Center (USC-TC) field sa Talamban, ning siyudad.
Ang USC mipahimulos sa ilang balwarte diin ilang gipilde ang St. Theresa's College (STC), 2-1 alang sa titulo sa girl's 17-class, samtang ang Sacred Heart School mi-iskor sab og 2-1 nga kadaugan batok sa Canduman Football Club aron sakmiton ang titulo sa players 10.
Sa laing bahin, ang Convergy's naghari sa Inter-BPO division human ilang gisirohan ang Innodata, 2-1, samtang ang ERCO Football Club mibuntog sa Count Football Club, 2-1 aron langkaton ang korona sa 38-above division.
Ang kampiyon nakaangkon og tropeyo ug medalya, samtang ang mga runners-up nakadawat og medalya.
Ang duha ka adlaw nga torneyo usa sa mga highlights sa Sinulog Festival. (BANAT NEWS)