CEBU, Philippines - Miabot ngadto sa 105 ka football teams ang mosalmot sa 1st Sinulog Football Cup nga mosikad karong buntag diha sa University of San Carlos-Talamban Campus (USC-TC).
Si tournament chairman Francis Ramirez miingon nga 100 ka teams ang gilauman nilang mosalmot, apan nasurprisa sa dakung turnout sa mga entrante.
Tungod niini, nausab ang orihinal nga eight categories tournament format ug gipun-an kini'g duha ka kategoriya nga mao ang Ladies Open ug Inter-BPO divisions.
Ang Ladies Open salmotan og lima ka koponan, samtang ang Inter-BPO adunay walo ka koponan.
Lain pang mga kategoriya mao ang Players 10 ug Boys 12 nga gisalmotan og napulo ka teams, Players 8 (13 teams), Boys 14 (12 teams), Boys 17 (7 teams), Girls 17 (12 teams), Men’s Open (21 teams) ug 38-Above (7 teams).
Ang kampiyon sa matag dibisyon makaangkon og tropeyo ug medalya, samtang ang mga runners-up makadawat og medalya.
Ang duha ka adlaw nga football festival usa lang sa mga highlights sa selebrasyon sa kapistahan sa Balaang Bata Señor Sto. Niño. (BANATSPORTS)