CEBU, Philippines - Sa labing unang higayon, ang dakbayan sa Ormoc maoy napiling host sa 64th National Students Basketball Championships unya sa Enero 14-19, 2011 didto sa Ormoc Superdome.
Kay sila man ang host, ang Ormoc gitugotan nga mopadala'g duha ka teams diin ang usa niini gikan sa silingang dakbayan sa Tacloban.
Adunay walo ka teams ang kompirmadong mosalmot sa maong sports event nga gipasiugdahan sa Basketball Association of the Philippines (BAP) pinaagi sa ilang secretary-general nga si Graham Lim.
Si Lim, kinsa bag-o lang nakagawas na human mabilanggo dul-an sa usa ka tuig mibisita dinhi sa Sugbu aron makighimamat ni BAP regional director Lorenzo 'Chao' Sy aron mangayo'g suporta gikan sa Cebu Schools Athletic Foundation, Inc. (CESAFI) ubos ni commissioner Felix O. Tiukinhoy, Jr.
Ang University of Cebu (UC) Webmasters modepensa sa ilang korona didto sa Ormoc human sila midaog sa Butuan City finals sa miaging tuig batok sa Southwestern University (SWU) Cobras.
Gawas sa UC, mosalmot sab ang Rizal Technical University nga morepresentar sa NCR, Perpetual University of Laguna gikan sa Southern Tagalog, University of Luzon ug ang PRISAA champion team gikan sa Zamboanga City nga morepresentar sa Southern Mindanao.
Si Lim mihimo na og kasabotan tali ni Region 8 BAP director Lucrecio Calo.
Ang torneyo ubos sab sa superbisyon sa Federation of School Sports Association of the Philippines (FESSAP) sa pagdumala ni Region 8 director Dr. Eduard Chua. (BANAT NEWS)