CEBU, Philippines - Ang garbo sa Sugbu ug nag-unang scrabble player sa nasud nga si Teodoro Martus mosuway og saka sa iyang ranggo sa dihang mopakita siya og aksiyon sa 2nd Iskandar Malaysia World Scrabble Festival sugod karong adlawa didto sa Zon Regency Hotel sa Johor Baru, Malaysia.
Uban ni Marus ang laing duha ka Sugbuanong sila si Jowar Ayuno ug Jose Mari Diamola, nga sama niya, pulos sab mga produkto sa University of the Visayas (UV).
Sila si Ayuno ug Diamola moduwa sa open category.
Kapin sa 200 ka mga partisipante gikan sa 20 ka nasud ang gikatakdang magtigi ning usa ka semanang scrabble festival nga sugdan karon uban sa 9th Causeway Scrabble Challenge.
Sundan kini sa labing unang Tournament of Champions karong Disyembre 7.
Ang Causeway Challenge naglatid og tulo ka dibisyon -- premiere, masters ug open.
Limitado lang kini ngadto 50 ka labing maayong laking scrabble players. Bahinon sila ngadto sa lima ka koponan ug moduwa og 45 ka duwa sa round-robin format sa lima ka adlaw.
Ang mga sakop sa modaog nga teams gantihan og gold, silver ug bronze medals. Ang overall individual champion mobulsa og US$30,000. May ganting salapi sab nga madawat ang mopahiluna gikan sa ikaduha hangtod sa ika-10 nga dapit. (BANATNEWS)