MANILA, Philippines - Hindi na kinaya pa nina Filipino netter Jeson Patrombon at Jarin Grinter ng New Zealand ang sakit ng mga tinamong injuries upang magdesisyon na huwag ng laruin ang quarterfinals match nila sa boys doubles ng 24th Yucatan World Cup laban kina Oliver Golding at George Morgan ng Great Britain kahapon sa Meridan, Mexico.
Si Patrombon ay may wart sa kaliwang paa dahilan upang makaramdam ito ng pananakit kapag naiaapak ito habang si Grinter ay may iniindang pulled stomach muscle dahilan upang makuha ng mga karibal na second seeds sa kompetisyon ang walk over na panalo tungo sa semifinals.
Sa pangyayari tuluyang nagwakas ang kampanya ni Patrombon sa kompetisyon na kanya ring kahuli-hulihan sa taong ito.
Pumasok sa quarterfinals sa singles, ang 17-anyos na si Patrombon ay inaasahang kukuha pa rin ng ITF puntos upang mapataas ang kasalukuyang 30th ranking sa mundo.
Magpapahinga si Patrombon at ipao-opera ang kanyang kaliwang paa upang maalis ang wart upang bumalik ang sigla nito sa pagkampanya sa 2011 season.
Inaasahang papasok pa rin sa top 15 si Patrombon sa world rankings matapos ang 2010 kahit hindi na maglalaro sa buwan ng Disyembre dahil ang 20 sa unang 30 manlalaro ay mawawala na sa talaan sa susunod na taon dahil lampas na sila sa age limit sa juniors division.