CEBU, Philippines - Gitakdang mobalik og dagan ang giilang "running queen" sa Sugbu nga si Mary Ann Delos Santos human nga wala na kini makadagan sud sa dul-an sa usa ka bulan nga weekend runs sa siyudad.
Si delos Santos modagan sa 15K women’s open sa M.O Plus Run nga mosikad ugma sa buntag diha sa Asiatown I.T. Park.
Bag-o pang mihaw-as og back-to-back championships didto sa kaulohan lakip na ang pagdaog niya sa 21K title sa Adidas King of the Road Run niadtong Oktubre 23, si Delos Santos subling mobalik dinhi sa Sugbu aron langkaton og balik ang iyang korona.
Si Delos Santos, kinsa padayong nangandam alang sa National Milo Marathon sunod buwan, makigginukdanay sa mga elite Cebuana runners, lakip na ang Milo Marathon Cebu leg champion nga si Mary Joy Tabal.
Sa iyang bahin, si race organizer Luigie Sanchez mipahibalo nga miabot na sa 1,500 runners ang mga kompirmadong modagan sa lumba nga adunay tulo ka race lengths -- 15K, 5K ug 3K.
Tipik sa matigom nga salapi ihatag usab ngadto Children's Hour Foundation, ang beneficiary sa maong lumba. – BANAT NEWS