CEBU, Philippines - Nanginahanglan pa og overtime ang Sunday Club sa wala pa sila maka-eskapo gikan sa kulbahinam nga duwa batok sa LLBA-1, 91-90 sa LLBA Rollway Inter-club basketball tournament didto sa Agus gym sa Lapu-Lapu City.
Migiya sa kadaugan sa Sunday Club mao sila si Ondo Casquejo ug Orly Amores nga parehong misansan og 31 puntos.
Gawas nilang Casquejo ug Amores, mikiat sab og maayo sa maong duwa si Centes Brañanola nga mikutlo og 20 puntos.
Dili matag-an kun kinsa ang modaog sa duwa gumikan kay ang duha ka koponan nagbanos-banos man og ilog sa labaw, apan ang LLBA-1 wala kalahutay kay gilupig kini sa kusog sa Sunday Club
Sa laing duwa, ang kanhi SWU Cobras nga si Dandan Ramos maoy mipadaog sa Solmeat/VKK batok sa Gemmary Pawnshop, 96-91.
Apan si Jojo Basmayor maoy topscorer sa iyang 26 puntos, gisundan ni Rene Daño sa iyang 23 puntos, samtang si Ramos mihipos og 12 puntos
Puntos Matag Usa
Unang duwa:
SUNDAY CLUB (91) - Casquejo 31, Amores 31, Brañanola 20, Sepe 6, Palad 3
LLBA I (90) - Aying 31, Manilag 20, Medina 12, Igot 11, Magat 10, Ouano 6
Ikaduhang duwa:
SOLMEAT/VKK (96) - Basmayor 26, Daño 23, Ramos 12, Ybañez 11, Cuadra 9, Lazaraga 5, Tampus 3, Juntilla 3, Pangatungan 2, Bascon 2
GEMMARY PAWNSHOP (91) - Gastador 44, Eya 30, Payawal 9, Gaña 7, Hermo 2, Cabigas 2, Villarde 2. – BANAT NEWS