CEBU, Philippines - Segurado na nga makaangkon og usa ka silver ug tulo ka bronze medals ang defending champion Team Cebu City (TCC) Niños human namupo og daog sa unang adlaw sa 2010 PLDT-ABAP Visayas Area Amateur Boxing Tournament sa miaging adlaw didto sa Mandaue City Plaza Square.
Gumikan kay aduna lamang duha ka entries sa juniors 54 kgs. division, deritso nang miabante sa final round si Rommel Cruz, kinsa makigsangka batok sa boksidor gikan sa Bago City, samtang hayag na usab ang bronze medals alang nila ni Jack Tepora (50 kgs.), Ramjess Colina (57 kgs.) ug Charlie Pocdol (64 kgs.) dihang miabante sila sa semis human sa draw.
Si John Danny Panit sa TCC Team B miabante usab sa semis sa 57 kgs. class, samtang ang iyang teammate nga si Jay Molijon midaog sa una niyang away batok ni Jovito Francisco. Ang pambato sa TCC A sa 46 kgs. nga si Uelmard Dignos midesisyon usab ni Raul Valencia sa Dumaguete ug si Jared Payao sa 52 kgs. mipilde ni Jason Enitia sa Maasin, 4-2.
Lahi sa iyang mga kauban, naigo sa demalas si Anthony Coral sa TCC dihang napilde siya sa puntos batok ni Martin Cordova sa Bago City, 10-23 sa elimination sa 46 kgs.
Sa ilang bahin, ang host team Mandaue nakakuha usab og lingkoranan sa finals uban ni Charlie Traya, kinsa makigsangka sa boksidor gikan sa Ormoc ubos sa 60 kgs., samtang si Rhian Canillas miabante sa semifinals sa 64 kgs. class.
Mi-iskor og usa ka referee-stoppage nga kadaugan si Danlou Codilla dihang iyang gipaundang sud sa19 segundos sa unang hugna ang pambato sa Cabancalan nga si Winmar Obar sa 46 kgs. category.
Mipakita usab og maayong labok ang Maguikay Team diin midaog ang ilang mga boksidor ubos sa 46 kgs. division, nga sila si Christian Bacolod, Richie Montealto ug Lorenz Romarate.
Mokompleto sa lista sa mga mananaog mao sila si Ferdie San Roque sa Cabancalan, Raymund Salmingo sa Boracay, Martin Cordova ug John Paul Artieda sa Bacolod, Jahil Ala, Aldrin Mori sa Maasin ug Niel Bryan Unay sa Samar ug Tagbilaran boxer Lemar Kahulugan. (BANAT)