CEBU, Philippines - Usa ka dakung lumba ang mahitabo didto sa lungsod sa Boljoon sa pagsikad sa Omega Pain Killer Xtreme Challenge: Boljoon Run To Restore karong Nobiyembre 7 nga manukad diha sa Boljoon town square.
Ang maong lumba usa lamang sa mga kalihukan sa duha ka buwan nga “Boljoon Sports Festival” nga gisugdan niadtong Septiyembre. Ang sportsfest maoy highlight sa nagsingabot nga kapistahan sa maong lungsod karong Nobiyembre 12-13.
Gibahin sa tulo ka dibisyon - 10K, 5K ug 3K, ang runners dili lang managan alang sa kompetisyon, apan aron usab masinati ang kaanyag sa labing karaang lungsod sa habagatang bahin sa Sugbu.
Ang bahin sa salapi nga matigom sa maong lumba idonar ngadto sa Boljoon Heritage Foundation nga maoy nag-atiman sa 400 na ka tuig nga stone church didto sa maong lungsod.
Ang registration fee nagkantidad og P300 alang sa 10K ug 5K entries, samtang libre ang registration sa 3K nga bukas lang sa mga Boljoanons. Ang registration forms mahimong makuha diha sa Philippine Sports Commission (PSC)-7 office sa Cebu City Sports Center ug ROX o Runner sa Ayala Center Cebu Active Zone.
Alang sa dugang impormasyon mahimong motawag ni Ronald Villanueva sa numero 482-9119. (BANAT NEWS)