CEBU, Philippines - Dakung tahas ang gipas-an sa Team Mandaue tungod kay gawas sa pagsakmit sa overall champion, depensahan usab nila ang ilang balwarte isip host sa 2010 Smart-ABAP Visayas Amateur Boxing Championships karong Martes diha sa Mandaue City Cultural and Sports Complex.
Bisan pa'g nagmalampuson sila sa miaging national level, kursonado gihapon ang Team Mandaue nga mohakot og daog sa regional human sila mapakyas pagsalmot sa miaging tuig.
Tulo ka koponan ang ipadala sa Team Mandaue ug kini mao ang Mandaue A, B ug C, diin ang matag koponan langkuban og mga amateur boxers nga produkto sa ALA Gym.
Ang komposisyon sa Team A mao sila si Kevin Jake Cataraja, Sherwilliam Cantil, Albert Pagara, Mark Bernaldez, Danlou Codilla, Reoxyl Tabogon, Michael Romarate, Christian Apawan, Melvin Besinga ug Robert Etorma.
Sa Team B mao sila si Elecio Taruc, Ferdie San Roque, Rie Muñez, Basilio Sultan, Robert Labanza, Rhian Canillas, samtang sila si Raymond Namucatcat, Christian Bacolod, Ritchie Montealto, Rayboi Pepito ug Jan Ivor Lastrella maoy pambato sa Team C.
Gawas sa tulo ka koponan sa Team Mandaue, laing duha ka boxing clubs sa siyudad sa Mandaue — Sanai Boxing Club ug Philippine-Australia Boxing Club (PABC) ang mosalmot usab sa torneyo.
Mikompirmar sab sa ilang partisipasyon ang Team Cebu City-Omega, Consolacion, Bago, Bacolod, Maasin, Boracay, Cabatuan sa Iloilo Province, Dumaguete, Bayawan, Bais, Tagbilaran, Sipalay, Sagay, Candoni, Siaton sa Negros Oriental, Matalom, Ormoc ug Tacloban. (BANATSPORTS)