CEBU, Philippines - Mipakita og dalaygong kaisug ang mga Cancer survivors human nila malampusong gitapos ang 3k Fun Run sa 4th Pink October Run kagahapon didto sa The Terraces sa Ayala Center-Cebu.
Gawas sa naandang kompetisyon, mas mikuha sa atensiyon sa mga running enthusiasts ang unom ka mga Cancer survivors nga sila si Mae Ann Solomon, Melen Navarro, Marlyn Dakay, Tintin Caballero, Chica Fararons ug Raul Araneta kinsa maisugong milabang sa finish line.
Kini ang labing unang higayun nga usa ka kategoriya ang gipahinungod alang sa mga Cancer survivors, agi'g haom usab sa tema sa Pink October Run nga usa ka“breast cancer” awareness event.
Sa 10k category, nag-una si Robert Daang sa oras nga 36:46.429, gisundan sa second ug third placer nga sila si Mark Anthony Bergantin (42:58.396) ug Darry Ygot (43:31.447). Misulod usab sa top 25 ang duha sa top female runners sa Sugbu nga sila si Madelyn Carter (49:19.595) sa ika-22 ug Mary Grace Delos Santos (49:20.323) sa ika-23 nga dapit.
Si Domenic Legaspi midominar sa 3k boys sa oras nga 19:30.260, gisundan nila ni Alton Amor sa oras nga 19:31.760 ug Jonas De la Cerna kinsa milabang sa finishline sa oras nga 25:16.570.
Migawas nga top-three finishers sa 3k girls sila si Lenlie Cardenas (16:49.710), Kacey Perez (26:34.410) ug Louise Castillo (34:44.210).
Poblacion Oriental nag-solo sa liderato
Giangkon sa Poblacion Oriental ang solong liderato sa bracket A dihang ilang gipilde ang Pitogo, 85-72 sa Inter-barangay division sa 2010 Mayor Teresa P. Alegado Cup Consolacion Fiesta Basketball League didto sa Consolacion Sports Complex.
Sikit ang duwa sa unang duha ka kuwarter, apan usa ka 10-0 run ang gipabuto sa Poblacion aron makuha ang 15 puntos nga labaw sa third period, 62-47.
Miaksiyon og gukod ang Pitogo ug ilang napahakan ang labaw ngadto sa tres puntos, 65-68 sa nahibiling 4:35 sa duwa, apan nakawang kini dihang napasulod ni Junnix Flores ang duha ka krusyal nga tira nga maoy milansang sa daog alang sa Poblacion Oriental.
Ang managsuong Larry ug Lemuel Malagar maoy nangulo sa Poblacion nga nagkumboya og 26 puntos.
Sa Association of Barangay Councils (ABC) category, ang San Narciso mihaw-as sab og daog batok sa TOORN (Tugbongan-Oriental-Occidental-Nangka) sa iskor nga 78-72.
Ang duha ka buwan nga torneyo gipasiugdahan ni executive committee chairman Julius Alegado, sports director Nilo Ferraren, Association of Barangay Council (ABC) president Gelio Maquilan ug SK Federation chairperson Madel Hyacinth Herrera. Ang technical gidumala ni sports commissioner ug kanhi FEU Tamaraws cager Paul Alelu Q. Flores. (BANATSPORTS)