CEBU, Philippines - Wala na sab kapugngi ang paghari sa Cebu jins human kini mikabkab og mga bulawan sa Petron National Invitational Taekwondo Championships niadtong Domingo didto sa Gaisano Grand Mall sa Bacolod City.
Si Glenn Lava maoy nangu og panguykoy og bulawan alang sa Cebu dihang iyang gidominar ang performance competition "teabaek," ang second dan form sa blackbelters.
Gilupig ni Lava si Galan Pierre sa Baguio ug Michael Montinola sa Antique.
Mitunol sab og dugang bulawan alang sa Team Cebu mao sila si Mcavynger Alob sa Sacred Heart School-Ateneo de Cebu ug Mikaela Calamba sa Science of Technology Education Center (STEC).
Sila si Lava ug Alob mao sab ang responsable sa Team Cebu sa pagdaog og team championship title sa synchronize poomsae dance human ilang gipilde ang mga koponan gikan sa Baguio, Antique, Negros ug Capiz.
Mihatag sab og medalya sa maong kadaugan mao sila si Iyan Lim, Claire Panaginip, Charisse Panaginip ug John Paul Laguna.
Ang lain pang mga medalists mao sila si Claire Panaginip sa University of San Carlos-BED South Campus, Iyan Lim sa Cebu Doctors’ University ug Miguel Calamba sa STEC nga pulos nakakuha og silver ug Shayann Uytengsu ug Charisse Panaginip, kinsa nidaog og bronze medals. – BANAT NEWS