CEBU, Philippines - Usa ka adlaw human nila masakmit ang korona sa secondary division sa Cebu Schools Athletic Foundation, Inc. (CESAFI), buot ni Cebu Eastern College (CEC) alumni president Chester Cokaliong nga ampingan ug panalipdan nila ang korona sa sunod tuig.
Matud pa ni Cokaliong nga angay gyud nga mogasto sila aron makakuha’g maayong mga players alang sa sunod season. Dili buot ni Cokaliong nga mahisama ang Dragons sa nasinati sa Cebu Institute of Technology (CIT) Wildkittens, kinsa gikan sa ilang kampiyonato, kalit usab dayon natagak niini nga season.
Sumala pa ni Cokaliong nga dili siya motugot nga mahitabo kini sa Dragons sa sunod tuig. Kun mapakyas man gani sila pagdepensa sa ilang korona, ang labing mahinungdanon nga nakasulod gihapon sila sa finals. Apan bug-at nga tahas ang sagubangon sa Dragons gumikan kay wala na sunod tuig ang siyam ka sinaligang players nga gipangulohan ni MVP Nike Montalvo.
Lima lang ka Dragons ang mahabilin sa sunod tuig ug sila mao si James Neil Sumayang, Lirio Abecia, Jefferson Roxas, Luther Nuevos ug Rex Darwin Villarosa. Ang mogradwar kauban ni Montalvo mao sila si John Li Anthony Damole, Mark Anthony Olayon, Johnmar Lou Regidor, Raymond Sypongco, Roy Vincent Villarias ug Benjamin James Zosa. (BANATSPORTS)