CEBU, Philippines - Ang Fairchild Team ug ang Mactan Apparel maoy milangkat sa korona sa volleyball events sa MEPZ-HRA Sportsfest sa Lapu-Lapu City.
Ang Fairchild Team midaog batok sa Mactan Apparel, 3-1 sa five sets aron maghari sa men’s division, samtang ang Mactan midaog batok sa Pentax sud sa tulo ka sets aron langkaton ang korona sa women’s division.
Ang volleyball maoy unang event nga natapos sa nahisgutang sportsfest.
Matud pa ni organizer Pat Niñal, may kompetisyon sab sa bowling ug chess.
Human sa duha ka adlaw nga kompetisyon sa HRA bowling didto sa SM Bowling Lanes, ang TMX Philippines maoy nakatigum sa highest team single ug highest team double pinaagi sa ilang 794 ug 1,519 pinfalls.
Ang TMX Philippines mihakot na og kinatibuk-ang 2,898 pinfalls human sa duha ka adlaw nga kompetisyon, gisundan sa Fairchild nga adunay 2,560 pinfalls ug dayon sa Lexmark sa ilang 2,488 pinfalls.
Mikompleto sa top 10 mao ang Taiyo Yuden (2,3399 pinfalls), Teradyne (2,220 pinfalls), Jewelpico (2,184 pinfalls), Phil-Japan (2,166 pinfalls), Aboitizland (2,132 pinfalls), Pentax (2,011 pinfalls) ug Makoto (2,001 pinfalls). – BANAT NEWS