CEBU, Philippines - Hingpit na nga naangkon sa Teletech Titans ang championship trophy human milansang sa ilang ikaduhang daog batok sa Aegis People Support, 66-60 atol sa "best-of-three" finals sa 6th Inter-BPO basketball tournament diha sa City Sports Club-Cebu gym sa Cebu Business Park.
Agresibo kaayo ang Aegis People Support pagsugod sa kumbati diin nagbaton kini og kuwatro puntos nga bentaha human sa first period, 16-12. Apan wala sila makasustiner sa momentum kay ang maisugong Teletech Titans miilog sa labaw sa halftime, 30-28.
Nakontrolar sa Teletech ang dos puntos nilang labaw human sa third period sa iskor nga 45-43. Diha na gipabuhagay sa Teletech Titans ang katapusang kusog sa final period aron maangkon sa hingpit ang sayes puntos nga kadaugan.
Si Lourenz Limpangog maoy topscorer sa Teletech Titans uban sa iyang game-high 21 puntos, samtang si Erwin Abellanosa mitimbre og 13 puntos, gisundan ni Raul Cabahug nga mitimang og 10 puntos.
Sa pikas bahin, si Vincent Barrera mao sab ang mikugi og panguha'g iskor aron pangulohan ang Aegis People Support. Si Barrera mi-iskor og 16 puntos, nakakuha sab siya og suporta ni John Louie Arriesgado ug regular season MVP Jomie Mendez nga nagkumboya'g 25 puntos. (BANATSPORTS)