CEBU, Philippines - Nagplano ang trainer ni Antonio Margarito nga si Robert Garcia nga mangayo og tabang gikan ni reigning middleweight champion Sergio Martinez nga magsilbeng sparmate ni Margarito alang sa iyang ensayo batok ni Manny Pacquiao karong Nobiyembre 13 didto sa Dallas Cowboys Stadium.
Ang Argentinian world champion maoy kanhi naghupot sa WBC junior middleweight title nga mao karon ang ilogan nila ni Pacquiao ug Margarito. Si Martinez misakmit sa WBC/WBO ug Ring Magazine human niya gipukan ang kanhi middleweight king nga si Kelly Pavlik.
“I’m very close to Sergio Martinez’ camp and they offered to help us out with whatever we need” matud pa ni Garcia. “So more than likely we will be having Martinez as one of our sparring partners.”
Si Garcia nagkanayon nga dakung tabang ang mahatag kanila ni Martinez kinsa adunay kapaspas sama ni Pacquiao. Kahinumduman nga si Martinez usa usab sa mga boksidor nga mihagit ni Pacquiao human mahugno ang sabot-sabot alang sa Pacquiao-Floyd Mayweather Jr. showdown.
Gipahibalo usab ni Garcia nga nindot ang dagan sa training ni Margarito kinsa hinay-hinay nang mipagawas sa iyang kusog human sa conditioning regimen nila sama sa pagdagan sa Mehikano sa tungason nga Mt. Baldy sa Estados Unidos. (BANATSPORTS)