CEBU, Philippines - Gimasaker sa Isla Sugbo ni team owner Dr. Oliver Seno ang ESRQ pinaagi sa pag-iskor og 103-73, samtang ang Unilink Shipping midaog sab batok sa Autolab, 76-65 aron moabante sa finals sa Powerball 1st Conference President Cup basketball tournament diha sa Cebu Eastern College (CEC) gym sa dalan Dimasalang, ning dakbayan.
Ang finals duwaon karong Domingo diha gihapon sa CEC gym.
Si playing coach Dr. Boy Te mihiwa og 14 puntos aron pangulohan ang Isla Sugbo nga mihipos og 6-0 win-loss record. Miabag sab ang iyang anak nga si Franco, kinsa miamot og 10 puntos.
Daku sab og natabang sa opensa silang Janjan Seno ug Jun Seno kinsa midugang og 13 ug 12 puntos matag usa, samtang sila si Inting Reyes ug Juanito Sasing miamot og nuybe puntos matag usa.
Ang Isla Sugbo daan nang nakapanimaho og daog pagsugod sa duwa dihang sayo nilang gilubong ang ESRQ ug padayon silang naglabaw og labing menos 30 puntos sa fourth period bisan og gipalingkod na ang mga sinaligan niining si Reyes ug Sasing.
Ang tanang 14 ka players sa Isla Sugbo ang nakahimo'g iskor sa maong kadaugan.
Upat ka players sa ESRQ ang mirehistro og double figures, apan wala kini makatandog sa Isla Sugbo tungod kay mas balanse ang opensa niini.
Sa sayo pa, si Danrey Baclay miposa og 14 puntos aron pangulohan ang Unilink, samtang si Venz Rafols midugang og 11 puntos.
Puntos Matag Usa
Unang duwa:
Unilink (76) - Bacaly 14, Rafols 11, Canete 9, Garcia 8, Quinanola 7, Navarro 6, Kwan 6, Dandan 5, Saliz 4, Madronero 4, Macion 2
Autolab (65) - Anos 12, Doblas 12, Luces 12, Gaviola 11, Aclan 6, Sunguran 6, Estorba 4, Largo 2
Ikaduhang duwa:
Isla Sugbo (103) - B. Te 14, J. Seno 13, Seno 12, F. Te 10, Reyes 9, Sasing 9, J. Mauro 7, Ocampo 6, Dajao 6, Minoza 6, O. Seno 4, Ceniza 3, Villacin 2, A. Mauro 2
ESRQ (73) - Solante 15, Vergara 15, Suico 12, Alota 10, Taboada 7, Rentucan 4, Nater 3, Abrera 3, Garcia 2, Polar 2. – BANAT NEWS