CEBU, Philippines - Mibahog og sagunsong 10 puntos ang idlas nga pointguard nga si Arrd Evan Diango sulod lang sa second period alang sa Southwestern University (SWU) Cobras, kinsa mipapas sa ilang 14 puntos nga biya sa first half aron mo-iskor og 67-63 nga kadaugan batok sa Don Bosco Technology Center (DBTC) Greywolves sa usa ka non-bearing game sa pagtapos sa elimination round sa 10th Cebu Schools Athletic Foundation, Inc. (CESAFI) niadtong Domingo diha sa Cebu Coliseum.
Ang Greywolves miposte og 14 puntos nga labaw, 28-14 sa nahabiling 6:18 sa second period, apan si Diango mibuhos og siyete puntos sa ilang 8-2 run aron makan-an ang labaw ngadto na lang sa otso puntos, 22-30, Iyang napasikit ang Cobras, 28-32 sa wala pa makaikyas ang Greywolves uban ang 35-30 nga bentaha sa halftime.
Si Diango maoy topscorer alang sa fourth-seed Cobras sa iyang 14 puntos.
Si Jefford Aldave mitapos bitbit ang 18 puntos alang sa Greywolves, samtang si Airell Tirado, kansang katapusang basket mihulga sa Cobras sa katapusang higayon, 63-67 sa katapusang uno minuto sa duwa, miabuno og 11 puntos.
Ang quarterfinals sugdan karong Huwebes, diin ang topseeds University of the Visayas (UV) Green Lancers ug Cebu Eastern College (CEC) Dragons, kinsa nakabaton og twice-to-beat, makigsangka sa ilang eight-seed nga mga karibal sa collegiate ug secondary divisions.
Ang Lancers makigharong sa University of Southern Philippines Foundation (USPF) Panthers, ang team nga naghatag kanila'g kalisdanan sa wala pa sila mokulit og otso puntos nga kadaugan, 67-59 niadtong Agosto 14, samtang ang CEC Dragons makiglayog sa University of Jose-Recoletos (USJ-R) Baby Jaguars, kinsa ilang gilubong og 14 puntos, 72-58 sa una nilang engkuwentro. (BANAT)