CEBU, Philippines - Gisugdan sa University of San Jose-Recoletos (USJ-R) Jaguars ang ilang kampanya sa Cebu Schools Athletic Foundation Inc. (CESAFI) secondary football tournament pinaagi sa paglansang og 1-0 nga kadaugan batok sa University of San Carlos (USC) Warriors kagahapon didto sa USC-Technological Center sa Talamban, ning siyudad.
Si Jude Alcoseba maoy miluwas sa adlaw sa USJ-R pinaagi sa iyang malampusong pagsuway gikan sa tunga nga gibana-banang singko metros gikan sa goal.
Sa laing bahin, ang duwa sa collegiate division sugdan karong hapon diha gihapon sa USC-TC.
Sa unang duwa, ang host-USC mosangka batok sa University of Southern Philippines Foundation (USPF), samtang sa main match, magtigi ang University of the Visayas (UV) ug ang University of Cebu (UC).
Ang CESAFI karong tuiga pagadumalaon sa kanhi presidente sa Cebu Football Association Jonathan Maximo uban sa Cebu Amateur Football Club. (BANAT NEWS)