CEBU, Philippines - Ang batan-ong cycling sensation sa Sugbu nga si Luis Miguel 'Igimax' Maximo subli na sab mopakita sa iyang abilidad sa 5th leg sa 2010 Philippine Premiere Cycling League Championship Series didto sa Macapagal Avenue, Parañaque City.
Si Maximo mao karon ang paboritong modaog sa junior class sa maong series human usab sa sunod-sunod niyang pagpangharos sa milabay'ng tulo ka leg nga una niyang gisalmotan.
Napakyas pagsalmot si Maximo sa third leg didto sa Subic tungod kay milarga siya sa Estados Unidos alang sa laing event. Paningkamotan ni Maximo nga makabawi siya karon sa iyang pagsalmot sa individual time trial (ITT) nga iyang taakon ang rota sa gilay-on nga 30 kilometros.
“ITT event is difficult for me. I don’t get to practice it because we don’t have many ITT races in Cebu,” matud pa ni Igimax.
Gawas sa kakulang sa ensayo, suliran usab ni Igimax ang iyang bisiklita kay usa kini ka roadbike ug dili haom alang sa ITT event.
Bisan pa niini, ang 15-anyos nga tinun-an sa Springdale School misaad nga buhaton ang tanan aron makahatag og dungog alang sa Sugbu. (BANAT NEWS)