CEBU, Philippines - Nabaraw sa University of San Carlos (USC) Baby Warriors ang mainitong rally sa second half nga gilusad sa Don Bosco Technology Center (DBTC) Junior Greywolves dihang mi-iskor kini og 70-64 nga kadaugan sa bugtong duwa sa secondary division sa 10th Cebu Schools Athletic Foundation, Inc. (CESAFI) kagahapon diha sa Cebu Coliseum.
Ning pagsuwat, padayon pang nagkumbati ang 5-0 University of the Visayas (UV) Green Lancers batok sa 1-4 nga University of San Jose-Recoletos (USJ-R) Jaguars.
Ang three-pointer ni Arsenio Uy sa katapusang 1:19 maoy nakapainat sa iskor ngadto sa 68-62 ug mao sab ang nagselyado sa kadaugan alang sa Baby Warriors, kinsa mipalambo sa ilang baraha ngadto sa 2-3.
Misikit pa unta sa katapusang higayon ang Junior Greywolves, 60-61 sa nahabiling 4:14 sa duwa sa basket ni Lex Mellijor ug molabaw pa unta sila, apan misipyat sa iyang tipsy-do nga tirada si Mark Elizondo III sa oras nga 1:33.
Mao kadto ang kinasikitan nga pilde sa walay daog nga Junior Greywolves, kinsa padayong midailos sa kinaubsan sa ilang 0-6 nga baraha.
Si Marlo Pono lang ang bugtong naghatag og kinabuhi sa team dihang iyang gipangulohan ang mainitong rally sa second half aron dili sila mabiyaan og maayo sa Baby Warriors.
Siya usab ang nakahimo’g double figures sa iyang 21 puntos.
Ang Baby Warriors nahasol og maayo sa depensa sa Junior Greywolves ug dili gyud sila makabuylo. Igo lang nila na-outscore ang DBTC, 18-15 sa third period ug nagtabla sila sa 16-all scoring sa fourth period.
Misaler na unta ang depensa sa Junior Greywovles, apan hinay-hinay napawong ang ilang kainit dihang natawgan og techical foul si Benedict Ruiz pagsugod sa fourth period ug nasundan sab sa technical foul gikan kang Mellijor.
Ang USC big man nga si Harvey Palapar maoy nangu sa opensa pinaagi sa iyang 15 puntos ug laing tulo ka kauban ang pulos mitampo og 10 puntos.
Puntos Matag Usa
USC (70) - Palapar 5, Lee Yu 10, Guardiario 10, Pajantoy 10, Uy 8, Romaguera 7, Bacaltos 2,Malana 1
DBTC (64) - Pono 21, Carbon 8, Escaño 7, Abelgas 5, Castro 4, Haben 3, Elizondo 3, Ruiz 3, Belangel 3, Mellijor 2. – BANAT NEWS