CEBU, Philippines - Magrambol na ang ALA Boxing Gym stars nga sila si Rey 'Boom Boom' Bautista ug Milan 'Milenyo' Melindo batok sa tagsa-tagsa nila ka mga langyaw'ng kaatbang sa "Philippines vs. The World" fight card karong alas-6 sa gabii diha sa Pacific Grand Ballroom sa Waterfront Cebu City Hotel and Casino.
Barugan karon sa 24-anyos nga si Bautista ang saad niya sa iyang mga kritiko nga pamatud-an nga andam na siya nga mobalik isip usa sa mga top Pinoy boxers sa iyang pakigbatok ni WBC Continental Americas featherweight king Alejandro 'Zorrito' Barrera sa main event.
"Pamatud-an nako sa tanan nga anaa gihapon nako ang katakus nga mamahimong world champion sa umaabot," matud pa ni Bautista atol sa official weigh-in kagahapon didto sa Atrium sa SM City-Cebu.
Kun molampos si Bautista, makuha niya ang kahigayonan nga makigbinukbukay batok ni Hector Julio Avila alang sa IBF Intercontinental featherweight crown karong Oktubre 29 didto sa Dubai.
Sa supporting main event, ang undefeated WBC Youth Intercontinental flyweight champion nga si Melindo laraw nga mokulit sa iyang ika-22 nga sunod-sunod nga daog, ning higayona batok ni Korean champion ug OPBF ranked No. 4 flyweight Jin-Man Jeon.
Makigsinukliay sab og kumo si ex-OPBF super bantamweight ug WBO AsPac super featherweight champion Jimrex Jaca batok ni ex-WBC Latino super featherweight titlist Pipino Cuevas, Jr. sa Mexico.
Samtang ang kanhi IBF minimumweight champion nga si Florante 'Little Pacquiao' Condes malaumon nga molampos sa iyang comeback fight batok ni PABA Interim minimumweight champion Sofyan Effendi sa Indonesia.
Mokompleto sa undercard mao ang sangka nila ni Marlon Alta sa General Santos batok ni Naozumi Tsuchiyama sa Tokyo, Japan, Jun Entor batok Jaime Alin Jr. sa Valencia, Wilbeth Loberanis batok Romulo Ramayan ug Pedro Balaba batok ni Kotsky Ebalang. – BANAT NEWS