CEBU, Philippines - Hingpit na nga naangkon sa Teradyne ang korona human nila gilubong ang Lao Customs Brokerage, 87-73 sa Elle Lao Cup 2010 basketball tournament didto sa Ibo gym sa Lapu-Lapu City.
Grabe kaayong nakaduwa si Mike Alcarde ug walay puas nga mipatuasik sa iyang opensa alang sa kinatibuk-an niyang 23 puntos aron gihayan ang Teradyne pagsakmit sa korona.
Nakakuha sab siya og maayong suporta gikan nilang Diego Emperio, kinsa mipupo og 15 puntos ug Ronan Wafer nga miani og 14 puntos.
Human milabaw og tres puntos paghuman sa first period, 24-21, ang Teradyne inanay nga miinat sa ilang labaw ngadto na sa siyete puntos sa halftime, 43-36, apan miaksiyon kini takilid sa third quarter hinungdan nga nakan-an sa Lao Customs Brokerage ang labaw, 63-59. Dali hinuon nakarekober ang Teradyne sa final period dayon pagtanom og 14 puntos nga kadaugan.
Tulo ka players sa Lao Customs Brokerage ang miposte og double figures nga gipangulohan ni Vincent Omo, kinsa mibirada og 17 puntos. Si Neil Euterio mihakot og 13 puntos, samtang si Jonel Enterio misakwat og 10 puntos sa ilang kapildihan. (BANAT)