CEBU, Philippines - Ang Japan Karate Association (JKA) Asia, Philippines Cebu Chapter mihatag og mga pasidungog ug pag-usbaw sa mga ranggo sa ilang mga sakop kinsa mipasar sa ilang eksaminasyon nga gihimo kaniadtong Hulyo 25 didto sa USPF-Gym sa Lahug.
Ang awarding rites gipahigayon sa miaging adlaw didto sa Hadsan Beach Resort sa dakbayan sa Lapulapu ug gipangulohan kini sa mga JKA Council of Senior Instructors kinsa gi-ila sa mga Hapon nga "shihankai." Ang mga awards gilangkuban gikan sa yellow ngadto na sa brown belts.
Ang yellow belts may tumbas nga 7th kyu samtang ang brown belts adunay lain-laing tugbang gikan sa 1st kyu ngadto na sa 3rd kyu.
Ang maong kalihokan gitambongan ni JKA chief instructor Vic Luna kauban ang pipila ka mga shihankais nga sila si Police Chief Inspector Edito Maribojoc, Erlando Metante ug Nilo Gonjuran.
Ang pipila sa mga junior instructors nga mitambong mao sila si Adriano Baclay, Neil Rosaroso, Roger Dabalos, Walter Gacayan ug Dahlia Espinosa.
Ang sakop sa JKA board of trustees nga si Atty. Nilo Balorio mitabang kang Luna ug sa ilang secretary-general sa pagpang-apud apod sa mga sertipiko ug usa sa mga awardees mao ang 2010 Korea karate competition champion nga si Noel Espinosa uban sab sa mga pipila ka JKA blackbelts.
Ang nahisgotang kalihokan maoy katumanan ug kalamposan sa panglantaw ni JKA-Philippines president Atty. Augusto W. Go, ang presidente sa University of Cebu ug Shihan Masanori Takahasi, ang JKA-Japan representative dinhi sa Pilipinas.
Ang mga sakop sa Advertisement and Promotions Committee mao sila si Emily Chiongbian isip chairperson, Maricel Que, Edyza Rafols, Lyn Moro, Annabelle Almira ug Bernadette Goyenche.
Gitapos ang maong kalihokan pinaagi sa mensahe ni Luna kinsa mipahibalo sab sa publiko sa mga umaabot nga torneyong salmotan sa JKA lakip na ang national tournaments. (FREEMAN)