CEBU, Philippines - Nakasugat og lisud nga kumbati ang University of Cebu (UC) Junior Webmasters batok sa Sacred Heart School-Ateneo de Cebu (SHS-AdC) Magis Eagles, apan nakahimo gihapon kini pag-iskor og 84-80 nga kadaugan kagabii sa 10th Cebu Schools Athletic Foundation Inc. (CESAFI) diha sa Cebu Coliseum.
Namintinar sa Junior Webmasters ang ilang sayes puntos nga labaw- 80-74 sa tunga-tungang bahin sa duwa, apan si Adamme Talisic gitawgan og technical foul tungod sa paggunit ni Adrian Muller nga naghatag sa Magis Eagles pagdagit sa momentum.
Si Talisic, kinsa mitampo og 11 puntos alang sa UC wala na paduwaa pa.
Si Bradley Bacaltos, kinsa nag-wild sa fourth period, miposa og duha ka technical free throws ug ang Magis Eagles nakatabla, 80-all human sa duha ka charities ni Muller, apan wala moirog ang iskor nila sukad niadto.
Sa sunod ball possession, si Oscar Pua Jr. mipasud og usa ka free throw human gi-foul ni Adven Jess Diputado sa nahabiling 5.1 segundos nga nakapalabaw sa Junior Webmasters, 81-80. Napun-an pa kini ni Rabani Comendador pinaagi sa duha ka free throws, 83-80. Si Comendador nakakubit sab og laing foul ug ang iyang split charities maoy miselyado sa kadaugan sa Junior Webmasters.
Si Alvin Labolabo, kinsa gipagawas sa sud sa korte kay gibikugan ang duha niya ka tiil, maoy topscorer sa Junior Webmasters nga miburak og 29 puntos.
Samtang sila si Muller ug Diputado parehong adunay tag-19 puntos aron pangulohan ang Magis Eagles.
Puntos Matag Usa
UC (84) - Labolabo 29, Yburan 17, Talisic 11, Aranas 9, Comendador 6, Grafilo 3, Pua 3, Otida 2, Nemeño 2, Oliva 2
SHS-AdC (80) - Muller 19, Diputado 19, Bacaltos 16, Cadavis 13, Abbu 8, Sing 3, Gabuya 2. – BANAT NEWS