CEBU, Philippines - Nakaginhawa pa ang Teradyne dihang ilang gibawsan ang higpit nga karibal Lao Customs Brokerage, 93-84 sa Game-2 sa ilang "best-of-three" 1st Elle Lao Cup basketball tournament didto sa Brgy. Pusok gym sa Lapu-Lapu City.
Ang Teradyne ug Lao Customs Brokerage magtiwas karon alang sa labing unang korona sa Elle Lao Cup karong alas-2 sa hapon didto gihapon sa Pusok gym.
Si Michael Alcarde miburak og 32 puntos, si Ronan Wafer mibahog og 24 puntos aron pangulohan ang Teradyne.
Ang topscorer sa Lao Customs Brokerage mao si Vincent Omo pinaagi sa iyang 33 puntos, gisundan ni Niel Entero nga adunay 20 puntos. Si Ronald Pino miabuno og 10 puntos ug si Peter Lee Dayon miamot og 10 puntos. – BANAT NEWS