CEBU, Philippines – Gigamit ni Roli Gasca ang iyang swabeng counter-punching alang sa unanimous decision nga kadaugan batok ni PBF super bantamweight champion Jayson Egera sa ilang 10 round non-title bout sa Summit Fight Night didto sa Gaisano Country Mall carpark.
Migawas nga mas kusgan ang walhon nga si Egera kinsa mi-pressure ni Gasca sa unang round, apan nakapabor ang taga-Barili nga si Gasca human niya magisii ang walang kilay ni Egera sa round 3.
Ang dakung gisi sa iyang kilay maoy naghatag og suliran ni Egera kinsa naglisud na pagpatama sa iyang mga tira ngadto ni Gasca. Human sa ilang sangka tulo ka mga hurado ang miiskor – 97-93, 96-94 ug 96-94 pabor ni Gasca.
Sa undercard bouts, gipatug sa round 2 ni Along “Boholano Bulldog” Denoy si Jason Geda sa Mandaue City sa ilang super flyweight bout, samtang gilupig usab sa puntusay ni Genesis Servania sa Bacolod ang Sugbuanong si Jestoni Pepito sa ilang superbantamweight showdown.
Gipukan sa flyweight prospect nga si Jerson Mancio si Roger Echavez pinaagi sa unanimous decision, samtang si Sarry Canonigo midaog usab batok sa taga-Mandaue nga si Gerpol Valero.
Mokumpleto sa resulta sa lista sa mga midaog sa ALA Boxing ug Summit Drinking Water fight card mao sila si Jocel Gestopa sa Consolacion ug Joseph Demos sa Dumaguete (BANAT NEWS)