CEBU, Philippines - Tungod sa iyang samad sa tuong tiil nga nakatunob og buka nga baso sa usa ka restaurant, dili pa makasalmot og tulo ka torneyo sa tennis si Serena Williams kay kinahanglan pa kining tahion ug ayohon.
Si Williams, ang no. 1 women’s player sa natad sa tennis, nasamad sa miaging semana ug dili una mosalmot sa dagkung torneyo sama pananglit sa U.S. Open, matod pa sa WTA Tour kagahapon.
Mipalta sab si Williams sa mga torneyo didto sa Istanbul, Cincinnati ug Montreal. Ang tour website wala mohatag og dugang detalye kung unsa gyu’y nahitabo didto sa restaurant.
“I’m so upset I won’t be able to play in the upcoming events because of this foot surgery,” sumala pa ni Williams nga mitug-an sa tour website. “Thank you for all of your support. I can’t wait to get back on the courts.”
Matod pa sa World Team Tennis nga dili makaduwa si Williams og usa ka tuig. Ang iyang team nga Washington Kastles nagkanayon nga naka-angkon siya’g samad sa iyang lapa-lapa ug kinahanglan pa kining tahion.
Niadtong Huylo 10, mitambong pa si Williams sa kasal nilang Carmelo Anthony sa Denver Nuggets ug Lala Vasquez didto sa New York. Sa nakuhang hulagway atol sa maong kasal, nakit-an si Serena nga dunay duha ka bendahe sa ibabaw sa iyang tuong tiil.
Si Williams midaug sa iyang ika-upat nga korona sa Wimbledon ug ika-13 niyang major title niining buwana. Ang dili na niya apilan karon mao ang Rogers Cup sa Montreal, Canada nga sugdan sa Agosto 16 ug ang U.S. open karong umaabot Agosto 30.
Human siya modaug sa Australian Open kaniadtong Enero, mipahuway si Williams kaniadtong Abril tungod sa piangon niyang wala nga tuhod.
Tungod niadto, napilde siya sa French Open quarterfinals sa miaging buwan human modaug sa Wimbledon. (BANAT NEWS)