CEBU, Philippines - Napakgang sa Misamis Oriental Meteors ang fourth quarter run sa Hobe-Taguig Global City ug midaog sa iskor, 107-92 ug ingon man pagposte og 2-0 record sa Cebu leg sa Tournament of the Philippines (TOP) gabii diha sa Cebu Coliseum.
Gikan 54-27 nga labaw sa halftime, ang MisOr mikunis-kunis sa Taguig sa third period sa pagpangulo ni kanhi UV standout Neil Raneses, Patrick Cabahug ug Ronald Lamocha aron inaton ang labaw ngadto sa 30 puntos, 77-47 sa nahabiling 2:26 sa maong kuwarter.
Sa final period, nalugakan ang depensa sa Meteors ug dali usab kaayong gipahimuslan sa Taguig nga milusad og 14-3 rally. Ang wingman nga si Benedict Fernandez mibugwak og 14 sa kinatibuk-ang 28 puntos sa katapusang dos minutos sa duwa aron panipsan ang labaw ngadto na lang sa nuybe puntos, 87-96.
Naputol hinuon ang init nga scoring run sa Taguig human gitawgan og “unsportsmanlike foul” ang ilang forward nga si Arden Guiyab, kinsa milamparo ni Raneses nga diriyot mosangpot sa lamok-lamok.
Ang maong insidente nakahatag sa Meteors og kahigayonan alang sa usa ka four-point play nga naghatag kanila og kampanting labaw. Ang duha ka sunod-sunod nga triples nila ni Khiel Miza ug Cabahug sa katapusang 30 segundos maoy mikandado sa daog alang sa Meteors.
Puntos Matag Usa
MisOr (107) - Cabahug 17, Saldua 15, Raneses 13, Lamocha 13, Misa 12, Lucernas 11, Taganas 10, Moreno 9, Daa 5, Andaya 2
Taguig (92) - Fernandez 28, Dela Cuesta 23, Gatumbato 10, De Castro 6, Viscarra 5, Guiyab 5, Marquez 4, Sta. Cruz 3, Lumungsod 3, Reguerra 3, Tajonera 2. – BANAT NEWS