CEBU, Philippines - Mikulit og dakung upset ang AMBL/ACDC ni team owners Allan Lim ug Rouchard Macias dihang ilang gipakaging ang mas lig-on nga Threesome/Stickerworld, 76-73 sa 15th Jaycees Basketball Association (JBA) Metro Cebu Uptown Jaycees basketball tournament didto sa City Sports Club-Cebu gym sa Cebu Business Park.
Sa sayo pa, ang Sherilin Plastics walay kukaluoy nga milubong sa Savers Home Depot sa iskor nga 96-67.
Nabiyaan unta og 18 puntos ang AMBL sa second period hangtod nga nahuman ang third period, apan kalit lang nausab ang dagan sa duwa pagsugod sa fourth quarter kay nagtusak-tusak na ang mga tirada sa AMBL.
Si Franco Te, ang anak ni playing coach Dr. Boy Te, miburak og 25 puntos lakip na ang upat ka sagunson nga triples aron pangulohan ang AMBL.
Ang kanhi sentro sa USJ-R Jaguars nga si James Relampagos mao sab ang nangulo sa pilderong Threesome/Stickerworld pinaagi sa iyang 23 puntos.
Ang AMBL nahimutang karon sa ikaduha uban sa Sherilin Plastics sa managsamang 2-1 win-loss records, samtang ang Threesome/Stickerworld adunay 3-1 nga baraha.
Gawas ni Te, mirehistro sab og double figures sila si Lim, ex-CIT Wildcat Jayson Jay Estella ug Chito Hernandez nga adunay 10 puntos matag usa.
Giharian og maayo sila si Edmund Odulio ug Jeremy Huang nga nagkumboya og 50 puntos aron pangulohan ang Sherilin Plastics. Si Dave Lim miamot og 17 puntos ug si Patrick Lopez mitampo'g 13 puntos.
Ang walay daog-daog nga Savers Home Depot (0-3) gipangulohan sa ilang team owner John Sulay ug Elmer Laguna nga parehong mibusdak og 16 puntos matag usa.
PUNTOS MATAG USA
Sherilin Plastics (96) - Odulio 29, Huang 21, Lim 17, Loperz 13, Jumawan 8, Mercado 5, Go 3
Savers Home Depot (67) - Sulay 16, Laguna 16, Chua 13, Pepino 8, De Jesus 6, Mateo 5, Dela Peña 3
Ikaduhang duwa:
AMBL/ACDC (76) - F. Te 25, Lim 10, Estella 10, Hernandez 10, Noel 7, Seno 6, Manal 4, Macias 2, Sullano 2
Threesome/Stickerworld (73) - Relampagos 23, Rosal 13, Besanes 13, Go 8, Lee 8, Flores 6, Conde 2, Tiongco 2 (BANATNEWS)