CEBU, Philippines - Gipukan sa Team C ang Team B, 2-1 aron paghari sa Deep Blue 'D' Woodpusher Executive Chess Team Tournament diha sa Deep Blue Chess Club sa SM City-Cebu.
Ang Team C nga gilangkuban nilang Romeo Lumanog, Condrad Pasion ug Marvyne Guardiana, mitapos sa five-round Swiss system competition uban ang 9.0 puntos aron pagbulsa sa P2,000 isip kampiyon.
Nimaneho sa Team B mao sila si Miguel Banibane, Jovert Uy ug Saturnino Sanchez, kinsa mibulsa sa P1,500 sa pagpahiluna sa ikaduha uban ang 6.0 puntos, samtang ang Team D nilang Jefferson Lendio, Manuel Abucay ug Rey Mendoza mitapos sa ikatulo sa ilang 5.0.
Ang board medalists mao sila si Maggi Dionson (F), Jovert Uy (B) ug Marvyne Guardiana (C).
Ang kalihukan nga gidumala ni international arbiter Marvin Ruelan sa abag ni Tony Cabibil nahimong posible pinaagi sa suporta ni Carlos Tan sa VisMin Marketing, Atty. Boy Tan, Jun Mendoza, Edgar Hortelano ug sa NCM Print and Design. (BANATNEWS)