CEBU, Philippines - Talagsaong kusug ang gipakita ni Edren “The Sting” Dapudong human niya gipatumba sa first round ang beteranong Mexican fighter nga si Jesus Jimenez aron masakmit ang WBC silver flyweight belt kagahapon didto sa Tepic sa Nayarit , Mexico.
Dili lang makausa, apan makaduha ka higayun nga gipahayang sa garbo sa North Cotabato nga si Dapudong si Jimenez sa wala pa gihunong ni referee Gerald Ritter ang away sa katapusang 2:52 sa round 1.
Sa maong kadaugan, si Dapudong mirehistro sa ika-10 nga sunod-sunod niya nga kadaugan dala ang record nga 18-2, 10KOs.
Giatangan usab ang pagsaka ni Dapudong sa world rankings sa WBC nga maoy unang lakang sa iyang damgo nga mo-away alang sa world title.
Wala hinuon buligi sa kapalaran ang laing Pinoy nga si Richard Garcia human kini nadisgrasya batok sa Mehikanong si Juan Jose Montes kinsa midaog pinaagi sa 4th round TKO. – BANAT NEWS