CEBU, Philippines - Ang Palarong Pambansa champion San Beda College (SBC) Red Cubs sa Sugbuanong coach Brit Carlo Reroma, maoy morepresentar sa nasud alang sa seven-nation ASEAN Schools Games karong Hulyo 13-19 didto sa Kuala Lumpur sa Malaysia.
Ang usa ka semanang kompetisyon nga adto ipahigayon sa Malaysia Amateur Basketball Association (MABA) Stadium, salmotan sab sa laing mga sakop sa ASEAN nation sa Singapore, Thailand, Vietnam, Indonesia, Brunei ug Philippines.
Ang Department of Education (DepEd) pinaagi ni Undersecretary Ramon Bacani, maoy mipili sa Red Cubs nga maoy mosalmot didto sa Malaysia ingon man usab sa women’s team gikan sa Caroline High School. Ang kompetisyon alang lang sa mga tinun-an sa high school nga nagpangedaron og 17 anyos paubos ug natawo sa tuig 1993.
Usa sa 12 ka players sa Red Cubs mao ang Sugbuanong si Daryl Nazareno, kinsa niduwa kaniadto sa University of San Carlos (USC) Passarelle team. Ig-agaw siya ni Alexander Nazareno sa University of Cebu (UC) Junior Webmasters.
Mokompleto sa line-up sa Red Cubs mao sila si Van Abatayo, Gelo dela Costa, Aldrin Nunas, Jayboy Babilonia, Francis Abarcar, Chris Lim, Gelo Malapitan, Buden Miranda, Michaell Tee, Michael Bonsubre ug Lexter Manalo. (BANATNEWS)