CEBU, Philippines - Nagpungasi nga mga kombinasyon ang gibuhian ni Rodex Piala sa Cebu City Sports Center (CCSC) stable nga maoy mipasurender ni Danilo Contando sa round 2 sa “Paboksing sa Rama Compound” diha sa Brgy. Basak San Nicolas, ning siyudad.
Si Piala usa sa walo ka CCSC boxers nga midaog sa amateur boxing card nga gipasiugdahan sa Cebu City Sports Commission ug ni Cebu City Mayor-elect Michael Rama.
Uban ni Piala nga mihatag og daog alang sa CCSC mao sila si Alil Ala (41 kgs), Junriel Jimenez (44 kgs), Allan Refuella (50 kgs.) Ian Refuella (51 kgs), John Kenan Villaflor (52 kgs.), Raymund Empic (54 kgs.) ug Zorro Mabel (54 kgs.).
Dili hinuon tanang CCSC boxers ang milampos sa ilang tagsa-tagsa ka mga sangka kay naigo sa demalas si Jeffrey Jimenez, kinsa napilde sa puntos batok ni Almer Dabon sa Sta.Cruz stable.
Nadisgrasya usab si Anthony Coral batok ni Ardie Boyose sa Omega stable, samtang si Pio Fanuga napilde sab human ma-injured sa third round batok ni Jerome Casas sa RWS stable.
Sila si Erwin Duazo ug Arjay Batawang sa Batawang stable midaog sab sa ilang tagsa-tagsa ka away. Si Duazo mipukan ni Iran Boyose sa Omega stable, samtang si Batawang mipilde ni Jetter Contando sa Flores stable.
Si Ryan Maano nangayo lang og usa ka minuto ug 37 segundos aron pagpukan ni Jesus Tudtud sa RWS stable. – BANAT NEWS